Un estiu que bolega !

Quoras ai començat de m’interressar a la cultura viua e musicala occitana, i a presque quinze ans desjà, la gens semblavan pensar que n’i aviá pas mai d’avenidor per une creacion contemporana de lenga d’òc.
Tot pariers, quinze ans pus tard, nòstra cultura s’es jamai tan ben sentida. De Bordeu a Niça, de Clarmont a Pau, la lenga bolega, inventa, es en movament. Dins las annadas 70, Joan Pau Verdier aviá mostrat la via, eu lo primier aviá tirat la dralha. Aviá, lo primier, druebert la pòrta d’una granda maijon de produccion nacionala, Philips, en far surtir dins lo mesma temps nòstra cultura dau ghetto regionalista ! Los jovens, de las annadas 2000, an, a son exemple, ublidat los complexes daus vielhs. Chanten en « patois » e merda aus pissa-vinagre. E nos trobem aura davant una vertadiera explosion culturala, giganta e prolifica. De nòstre folclòre los joens se tornen inventar la tradicion. Marselha, Tolosa, Rodez, son vengudas daus talhers de creacion occitana, coma si se’n fuguessa de talhers de tissiers. Mossur Raggamuffin se’n vai se « Pacsar » coma la Dauna Scottish, e lo Preciós chant liturgic se tròba acoquinat coma la Fringuenta tchatcha marselhesa. La micromecanica es devenguda lo mestier d’art daus artistas occitans de uei coma farjar daus vers fuguet lo trabalh professionau daus trobadors de l’edat-mejan.
Per mielh vos rendre compte de queste « underground » occitan, vos convide a anar vos permenar duren l’estiu en Perigòrd e enmai dins tot lo grand sud-oest a la descruberta d’un noveu monde. A la debuta de julhet, en mai de la felibrejada de Mussidan, se debanarà a Brantòsme, lo 1° e lo 2, la « Troubateuf ». Aqui la diversitat cultutrala occitana vai se metre en sèna sus la riba de la Drona. Luc Aussibal, Mauresca Fraca Dub, Familha Artus, los Sous-Fifres de Sent Peire, Madrigal, e ben d’autres son programats per quela festa daus trobadors dau segle XXI. Un pauc pus tard dins lo mes i aurà la Tradigordina a a Lalinda. E de segur vos faudrà pas ublidar los12/13/14 d’aòst las « Transoccitanas » de Bordelha emb entre autre lo ska-punk nervós daus Goulamas’k.
Si n’avetz pas pro, podretz surtir dau despartament. Tresesma setmana de julhet la granda veirina de la creacion occitana prendrà plaça coma chasca annada a Rodez : 5 jornadas e serenadas d’espectacles agratis onte seràn presentats nonmàs d’artistas occitans. Una setmana de musica, teàtre, conte e conferenças a l’entorn de la cultura viua de l’occitania d’auei ! E puei de segur vos faudrà tanben passar a la « Festa d’òc » de Besiers e a la « Hestejada d’Uzeste » dins lo sud Gironda. E enquera pòde pas vos parlar de tots.
‘Laidonc, qui a ditz que n’i a pas d’avenidor per la cultura d’òc. Nonmàs un neci zo podriá enquera pensar. Tot au contrari, jamai n’a tant bolegat nòstra lenga dempuei 250 ans de miseria jacobina. E vos promete que lo melhor es enquera per venir...