los noveus talibans.

Un jorn de triste memòria, en Afganistan, los Talibans aguèren la meischenta ideia de destruir de las estatuas millenarias. Sembla que quò anava pas tròp emb la concepcion que se fasián de lor religion. Totas las chadenas de televisions nacionalas, totas las radiòs, tots los jornaus ne’n faguèren lors titols. De segur qu’avián rason de se mostrar maucorats. I aviá aqui un acte vertadierament òrre contre l’umanitat dins son ensemble, une ataca vergonhosa contre l’ideia mesma de cultura e de diversitat culturala. E la quite UNESCO s’esmalissèt contre quilhs falords sens arma. !!!

I a pas gaire, a la debuta de l’ivern darrier, un chaçaire ; benleu un pauc espoterlat tanben, trobèt finaud de ‘nar se permenar a l’entorn dau territòri de la darriera orsa daus Pireneus. Malurosament çò que deviá arribar arribèt . E lo chaçaire, per se sauvar la peu, deguèt tuar quela pauvra bestia qu’era l’ultima represententa de sa raça. Los mediàs se faguèren jutge, procuror e borreu per condamnar quela babòia per lo crimi òrre que veniá de far contre l’ideia mesma de natura e de sauvegarda de l’ecologia. Lo quite President de la Republica francesa declarèt l’encausa de l’Ors daus Pireneus coma « Encausa Nacionala »,! Un pauc tard benleu, màs zo dissèt tot pariers, e que faliá far quauquarren, miladius !

Uei, en França, la lenga d’òc, coma lo breton o lo catalan o lo basque, son trapadas de morir. Pauc a pauc los locutors naturaus dispareissen, e la transmission se fai pus a las generacions seguentas. La propchena lei Fillon sus l’escòla e son famós « Tronc comun » ne laissa pas gaire de plaça per la cultura istòrica de nòstre ranvers : pas mai d’evaluacion au brevet daus collegis, pas d’aumentacion dau coefficient de l’opcion au bachelierat au moment ente latin e allemand se vesen passar dau coefficient 2 a 3, pas mai d’ensenhament en bilenga o en mairala ente sola la lenga estrangiera serà considerada. Dins 25, 30, benleu 50 ans nòstra lenga, la lenga de Jacquou aurà per càs disparegut ! Màs ente son las cameràs per zo filmar, ente son las radiòs nacionalas per zo dire e los medias nacionaus per ne’n parlar au monde ? Ente qu’es l’UNESCO per cridar a l’escandau e a l’assassinat barbare ? Ente qu’es lo President de la Republica francesa per declarar la sauvegarda de las lengas istòricas de França coma « Encausa Nacionala ». Lors fau a tots ses preissar, avem pus gaire de temps per reagir. E fasem pas a nòstra lenga çò que se faguèt a l’orsa daus Pireneus.

Una bona orason vaudrà jamai una meischenta vita, maugrat tot çò que pòt se’n dire…