Fau ‘chabar de barrar tots los cors d’occitan de Peirigùs !

Perque trentalhar ? Perque contunhar de far chara de voler mantener daus cors d’occitan a Peirigùs ? Zo vos demanda !
Aura, i a pus nonmàs 3 oras d’occitan, tots niveus boirats, per l’ensemble daus liceus de la vila de Peirigùs ! E per rendre la matiera mai agradiua e plasenta, doas oras sus las tres son plaçadas lo dimecres aprèp-miegjorn. En veire quò qui tota persona normalament constituida se pòt dire que, manca benleu quauques joens militants occitanistes, pagun escolan voldrà anar far cors per apprendre la lenga istòrica de nòstre Peirigòrd. Quò sembla vertadierament ad una mòrt programada, anonciada e ipòcrita de l’occitan au liceu. Un pauc de coratge queraque !
Fau talhar dins lo viu, còp sec d’abòra. Se volen pus d’ensenhament d’occitan dins los liceus publics de Peirigùs fau i anar e tot barra definitivament. Laissar tres oras entau, coma un alibí, es anti-pedagogic e mespresant per queste ensenhament. Vau melhor ne’n demorar qui e virar la pagina de quela aventura començada en 1951 emb la lei Deixon e confortada per Gilles Savary, puei Xavier Darcos e Jack Lang.
Sembla tot pariers que las chausas podrián benleu enquera virar autrament. En efech, l’annada 2004 a provat que emb un pauc d’informacion e de volontat la demanda d’ensenhament d’occitan exista chas los liceans peirigordins. E qu’en mai, la collectivitats territorialas son sensiblas a queu problema en sostener coma poden quela matiera.

Per ‘chabar, coma non pas rire (jaune) quand vesen qu’au moment ente se programa la disparicion de l’occitan dins los liceus de Peirigùs, lo Rectorat emb la Region vai mandar a tots los eslhèves de claças de tresesme d’Aquitania un desplejant per far la promocion de l’ensenhament de l’occitan (coma dau basc) au liceu ! Vos dise, fau ne’n chabar emb l’ipòcrisia !

Lexic : trantalhar (hésiter), far chara (faire mine).